ФЕОФИЛ

ФЕОФИЛ (донъяуи исеме Татарский Феодор; 21.1.1767, Белгород губ. Двуречная биҫтәһе — 14.11.1830, Харьков ҡ.), дин әһеле, Ырымбур һәм Өфө епискобы (1819—23). Архиепископ (1826), архимандрит (1804). Монахлыҡ ҡабул иткән (1803). Харьков коллегиумын тамамлаған (1789). 1803 й. алып дини уҡыу йорттарында уҡытыусы, ректор, бер үк ваҡытта Архангельск һәм Холмогор, Новгород, Чернигов епархиялары монастырҙары настоятеле; 1823 й. башлап Екатеринослав, Херсон һәм Таврия епискобы. 1827 й. ялға сыға. Өфө епархияһы етәксеһе вазифаһында Өфөлә Библия йәмғиәте ком‑тын аса, Ир балалар дини училищеһында татар теле курсын (икеһе лә — 1820), епархиаль цензорҙар ин‑тын, Дини дәрәжәле фәҡирҙәр попечителлеге ком‑тын (икеһе лә — 1821) ойоштора; Ф. ваҡытында 13 таш сиркәү төҙөлә, Бөгөлмә һәм Силәбе ҡҡ. 2 сиркәү собор статусын ала.

Әҙәб.: С е р г е е в Ю.Н. Православное духовенство Южного Урала в конце XVIII — первой половине XIX вв. (на примере Оренбургской епархии). Уфа, 2007.

Ю.Н.Сергеев

Тәрж. Ә.Н.Аҡбутина