ХӨСНӨТДИНОВА Эльза Камил ҡыҙы

ХӨСНӨТДИНОВА Эльза Камил ҡыҙы (24.5.1954, Өфө ҡ), генетик. Рәсәй мәғариф академияһының мөхбир ағзаһы (2016), БР ФА академигы (2012), биология фәндәре докторы (1997), профессор (1998). РФ‑тың (2004) һәм БР‑ҙың (1999) атҡаҙанған фән эшмәкәре. К.Ш.Әхиәровтың ҡыҙы. БДУ‑ны тамамлағандан һуң (1976) Биохимия һәм генетика институтында эшләй: 1983 й. алып өлкән ғилми хеҙмәткәр, 1990 й. — төп ғилми хеҙмәткәр, 1994 й. — лаборатория, 2002 й. — бүлек мөдире, 2017 й. башлап директор вазифаһын башҡарыусы, 2020 й. — директор. Фәнни эшмәкәрлеге кешенең медицина, популяция һәм молекуляр генетикаһы проблемаларына арналған. Х. тарафынан ДНК полиморфизмы тураһындағы мәғлүмәттәр нигеҙендә Волга-Урал төбәге, Урта Азия һәм Кавказ халыҡтарының генофонд структураһы һәм генетик тарихы өйрәнелә, БР‑ҙа нәҫелдән килгән патологияларҙың геногеографияһы һәм молекуляр‑генетик структураһы тикшерелә. Х. етәкселегендә 15 нәҫелдән килгән, 17 нәҫелдән килгән бирешеүсәнле ауырыуҙарҙың гендарына анализ үткәрелә, нәҫелдән килгән ауырыуҙарҙың пренаталь һәм иртә ДНК‑диагностикаһы алгоритмдары эшләнә һәм ҡулланыла. Этногенетикала фәнни йүнәлешкә нигеҙ һалыусы. БР‑ҙың фән һәм техника өлкәһендәге Дәүләт премияһы лауреаты (2015). Халыҡтар дуҫлығы ордены менән бүләкләнгән (2014).

  Хеҙм.: Молекулярная этногенетика народов Волго-Уральского региона. Уфа, 1999; ДНК-диагностика и профилактика наследственной патологии в Республике Башкортостан. Уфа, 2005 (авторҙ.); Этногеномика народов Центральной Евразии: структура генофонда и молекулярно-генетические основы наследственной патологии. Уфа, 2014 (авторҙ.).

Тәрж. Г.А.Миһранова