ЮЛЫҠ ЙӘМИҒ МӘСЕТЕ
ЮЛЫҠ ЙӘМИҒ МӘСЕТЕ, 1911 й. Ырымбур губ. Орск өйәҙе Юлыҡ а. (БР‑ҙың Баймаҡ р‑ны) М.М.Рәмиев һәм Мөхәмәтшакир М.Рәмиев (ҡара: Рәмиевтәр) аҡсаһына төҙөлә. Ырымбур мосолман диниә назараты ҡарамағында була. Мәсет (20×12×8) бер ҡатлы, таштан һалынған, ҡыйығы 4 яҡлы, 5 ҡырлы михрабы (ғибәҙәт уйымы) бар. Манараһы (бейеклеге 15 м) 8 ҡырлы, 2 яруслы, аҫҡы өлөшө (таш) өҫкө өлөшөнән (ағас) манараны уратып эшләнгән балкон м‑н айырыла; торҡа рәүешендәге көмбәҙенең ослайып торған ҡыйығына ярты ай ҡуйылған. Мәсеттә 2 ғибәҙәт залы бар. Мәсет эргәһендә Юлыҡмәҙрәсәһе, китапхана эшләгән. 1930 йй. уртаһында ябыла, бинаһы складҡа бирелә, 1993 й. диндарҙарға ҡайтарыла. Имам‑хатип Г.М.Зәйниғәбдинов билдәле. Мәсет бинаһы тарих һәм архитектура ҡомартҡыһы булып тора.
Ә.З.Сәйғәфәров
Тәрж. Ә.Н.Аҡбутин
