ЯҠУП ТОҘЛО ҺЫУ СЫҒАНАҒЫ
ЯҠУП ТОҘЛО ҺЫУ СЫҒАНАҒЫ, Яҡут тоҙло һыу сығанағы, тәбиғәт ҡомартҡыһы (1965). Көйөргәҙе р‑ны Яҡут а. төньяҡҡа табан 2,5 км алыҫлыҡта Ҡаҙлайыр й. (Һаҡмар й. басс.) һул ярында урынлашҡан. Күл (диам. 20 м, тәрәнлеге 1 м) барлыҡҡа килтереүсе бер нисә сығышы (90 м һуҙымында) булған минераль һыусығанағы. Аҫҡы пермдең көңгөр ярусы тоҡомдарында (алевролит, гипс) барлыҡҡа килә. Дөйөм дебиты яҡынса 1,5 л/с. Минераллашыуы 2,2—13,4 г/л. Һыуы тоҙло, хлорид‑натрийлы; микроэлемент миҡдары (мг/л): иод (0,006—0,013), бор (0,4—1,0), бром (1,11), фтор (1,4—2,25); газ составы б‑са кислородлы; т‑раһы 6,5—9,5°С. Сығанаҡ сыҡҡан урында минераль ләмдәр (майҙаны 200— 250 м2, ҡалынлығы яҡынса 2,5 м) ята. Тирә‑яғы һаҙланған.
Р.Ф.Абдрахманов
Тәрж. А.Н.Күсеев