РОЗЕНБЕРГ Геннадий Самуилович

РОЗЕНБЕРГ Геннадий Самуилович (30.5.1949, Өфө ҡ.), эколог, фитоценолог. РФА‑ның мөхбир ағзаһы (2000), биология фәндәре докторы (1984), профессор (1996). РФ‑тың атҡаҙанған фән эшмәкәре (2000). БДУ‑ны тамамлаған (1971). 1973 й. алып Биология институтында эшләй: 1980 й. — өлкән ғилми хеҙмәткәр, 1984 й. — лаборатория мөдире. 1987 й. башлап РФА Һамар фәнни үҙәгенең Волга бассейны экологияһы институтында (Тольятти ҡ.): баш ғилми хеҙмәткәр, 1989 й. — лаборатория мөдире, 1990 й. — директорат ағзаһы, 1992—2018 йй. директор. Фәнни тикшеренеүҙәре теоретик һәм төбәк экологияһына, фитоценологияға арналған. Р. тарафынан экосистемаларҙың структураһын һәм динамикаһын анализлауҙың яңы ысулдары, эре төбәктәрҙең экологик торошон прогнозлауҙың эксперт системаһы эшләнә, Волга бассейнына һәм Һамар өлкәһенә комплекслы экологик баһа бирелә. РФ Хөкүмәтенең фән һәм техника өлкәһендәге премияһы лауреаты (2010).

Хеҙм.: Модели в фитоценологии. М., 1984; Лики экологии. Тольятти, 2004; Теоретическая и прикладная экология. Нижневартовск, 2004 (авторҙ.).

С.С.Хәйретдинов

Тәрж. Г.А.Миһранова