ЯУАПТАРҘЫ СТАБИЛЛӘШТЕРЕҮ

ЯУАПТАРҘЫ СТАБИЛЛӘШТЕРЕҮ, мәсьәләләрҙең яуабын даими ҡиммәткә яҡынайтыу. Диффузия процестарын тикшергәндә, мәҫ., ер аҫты һыуҙарындағы ағыулы матдәләр концентрацияһын хәүефһеҙ кимәлгә тиклем кәмегән ваҡыт аралығын билдәләү өсөн, һ.б. ҡулланыла. Башҡортостанда 20 б. 80‑се йй. башында Математика ин‑тында эллиптик һәм параболик тигеҙләмәләрҙең Я.с. б‑са тәүге тикшеренеүҙәр үткәрелә, параболик тигеҙләмәнең түбән быуындарына ҡарата Я.с. өсөн етерлек булған талаптар билдәләнә (А.М.Ильин). Я.с. б‑са тикшеренеүҙәр ш. уҡ БДУ‑ла, БДПУ‑ла, СДПА‑ла алып барыла. Сикләнмәгән өлкәләрҙә беренсе ҡатнаш мәсьәләгә параболик тигеҙләмә өсөн Коши мәсьәләһенең Я.с. критерийы киңәйтелә, икенсе дәрәжә квазиһыҙыҡлы параболик тигеҙләмәләр системаһы өсөн Я.с. тиҙлегенең баһалары табыла (Ф.Х.Мөҡминов). Ике үлсәмле Навье—Стокс тигеҙләмәләре системаһының Я.с. билдәләнә (Н.А. Ҡолһарина), параболик типтағы псевдодифференциаль тигеҙләмәләрҙең Я.с. тиҙлеген билдәләүсе сикләнмәгән өлкәнең геом. характеристикалары табыла (Л.М.Кожевникова), дүртенсе һәм алтынсы дәрәжә параболик тигеҙләмәләр осрағында Риккье мәсьәләһенең Я.с. тиҙлегенең аныҡ баһалары иҫбатлана (И.М.Бикҡолов).

Ф.Х.Мөҡминов

Тәрж. Р.Ғ.Ғилманов