ПУЧКОВ Лев Александрович

ПУЧКОВ Лев Александрович (5.7.1938, Сыуаш АССР‑ы Порецкое а. — 4.1.2021, Мәскәү ҡ.), тау инженеры. РФА‑ның мөхбир ағзаһы (1991), БР ФА‑ның почётлы академигы (1995), техник фәндәр докторы (1974), профессор (1978). РФ‑тың атҡаҙанған фән эшмәкәре (1997), РФ яғыулыҡ‑энергетика комплексының почётлы хеҙмәткәре (1998). Мәскәү тау институтын тамамлағандан һуң (1961) СССР ФА Кольский филиалының Тау‑металлургия институтында (Апатиты ҡ.) эшләй. 1963 й. алып Мәскәү ҡорос һәм иретмәләр институтында: өлкән ғилми хеҙмәткәр, 1976 й. башлап проректор, 1987 й. — ректор, 2007 й. — президент, бер үк ваҡытта 1981 й. алып автоматлаштырылған идара итеү системалары кафедраһы, 1992 й. — ҡатлам ятҡылыҡтарын ер аҫтында үҙләштереү кафедраһы мөдире, 2012 й. — Стратегик тикшеренеүҙәр үҙәге директоры. Фәнни эшмәкәрлеге тау эше һәм рудник аэрогазодинамикаһы өлкәһендәге тикшеренеүҙәр менән бәйле. П. етәкселегендә тау‑технологик процестар менән синергетик идара итеү, тау‑ҡаҙылма предприятиеларын, шахта метаны сығарыу һәм ҡулланыу технологияларын мониторингылау теориялары төҙөлә. “Горный журнал” (“Тау журналы”) журналы баш мөхәррире (2002 й. алып). РФ Хөкүмәтенең фән һәм техника өлкәһендәге премияһы (2003), Н.В.Мельников (1977), А.А.Скочинский (1997, 2003) исемендәге премиялар лауреаты. “Почёт Билдәһе” (1981), 4‑се дәрәжә “Ватан алдында күрһәткән хеҙмәттәре өсөн” (2008), Дуҫлыҡ (1998) ордендары менән бүләкләнгән.

Х е ҙ м.: Аэродинамика подземных выработанных пространств. М., 1993; Реальность промысловой добычи метана из неразгруженных угольных пластов. М., 1996; Извлечение метана из угольных пластов. М., 2002 (авторҙ.).

Тәрж. Г.М.Ғәлиева