ҺАҘ МУНСАҒЫ
ҺАҘ МУНСАҒЫ, хамедафне (Chamаedaphne), арса һымаҡтар ғаиләһенә ҡараған үҫемлектәр заты. Затта 1 төр — ябай Һ.м. Төньяҡ ярымшарҙың уртаса һәм субарктик бүлкәттәрендә таралған. Йәйенке һорғолт‑көрәнһыу ботаҡлы, нәҙек төктәре булған йәш үренделе мәңге йәшел бәләкәй ҡыуаҡлыҡ, бейеклеге 20—50 см. Япрағы тиресәле, оҙонса‑ланцет формаһында, сиратлы, ваҡ тәңкәләре бар. Сәскәһе аҡ төҫтә, сүмес‑ҡыңғырауға оҡшаш, һалынҡы, бер яҡлы япраҡлы тәлгәштәрҙә урынлашҡан. Майҙа сәскә ата. Емеше — ҡумта, июлдә өлгөрә. Һаҙ мүге булған һаҙлыҡтарҙа һәм һаҙмат урмандарҙа үҫә. БР‑ҙа Балтас, Благовещен, Бөрө, Дүртөйлө, Ҡалтасы, Нуриман һ.б. райондарҙа осрай. Ағыулы үҫемлек, баллы үҫемлек. БР‑ҙың Ҡыҙыл китабына индерелгән.
А.Ә.Мулдашев
Тәрж. Г.А.Миһранова