БЕЛЬСКИЙ Иван Фёдорович

БЕЛЬСКИЙ Иван Фёдорович (22.9.1923, Өфө ҡ. — 8.12.1978, Мәскәү ҡ.), химик‑органик. Химия фәндәре докторы (1964), профессор (1974). Б.В. һуғышында ҡатнашыусы. МДУ‑ны тамамлағандан һуң (1954) СССР ФА‑ның Н.Д.Зелинский исемендәге Органик химия институтында (Мәскәү ҡ.), 1967 й. алып Иркутск органик химия институтында, 1970—76 йй. СССР ФА Себер бүлегенең Нефть химияһы институтында (Томск ҡ.; 1974 й. тиклем лаборатория мөдире) эшләй. Фәнни эшмәкәрлеге фуран һәм гидрофуран берләшмәләренең каталитик әүерелештәрен өйрәнеүгә арналған. Б. тарафынан күпләп алмаштырылған фурандар, ди‑ һәм тетрагидрофурандар, пиридиндар һәм уларҙың гидросығарылмаларын, шулай уҡ алифатик рәттәге окси‑ һәм оксокарбон кислоталарының сығарылмаларын синтезлауҙың селектив ысулдары эшләнгән. Ҡыҙыл Йондоҙ ордены менән бүләкләнгән (1945).

   Хеҙм.: Синтез на основе фурановых и гидрофурановых соединений //Гетероциклы в органическом синтезе. Киев, 1970; Катализ в химии фурана. М., 1972 (авторҙ.).

Т.Б.Бельская

Тәрж. Ғ.Ғ.Бикбаева