БИКМӨХӘМӘТОВА Ризәлә Миңнулла ҡыҙы

БИКМӨХӘМӘТОВА Ризәлә Миңнулла ҡыҙы (22.5.1933, Бәләбәй ҡ. — 27.9.2021, Өфө ҡ.), хор дирижёры. Профессор (1983). РСФСР‑ҙың (1983) һәм БАССР‑ҙың (1966) атҡаҙанған сәнғәт эшмәкәре. Ш.М.Бикмөхәмәтовтың апаһы. Мәскәү консерваторияһын тамамлаған (1956; В.Г.Соколов класы), Гнесиндар исемендәге Музыкаль‑педагогик институтында (Мәскәү ҡ.) стажировка үтә (1969; етәксеһе — А.А.Юрлов). 1957 й. алып Башҡ. филармонияһының Йыр һәм бейеү ансамбленең художество етәксеһе һәм дирижёры. 1960—69 йй. Өфө сәнғәт училищеһы уҡытыусыһы, бүлек мөдире, бер үк ваҡытта Гнесиндар исемендәге Музыкаль‑педагогик институтының Өфө уҡыу‑консультация пункты уҡытыусыһы һәм мөдире вазифаһын башҡарыусы. 1969—2018 йй. ӨДСИ‑лә эшләй (1969—91 йй. һәм 2006—12 йй. хор менән дирижёрлыҡ итеү кафедраһы мөдире). Б. етәкселегендә Башҡ. йәштәре һәм студенттары хоры — Бөтә Рәсәй художество ижады смотры лауреаты, Мәскәү ҡ. Башҡ. әҙәбиәте һәм сәнғәте аҙналығында (1961), Ленинград ҡ. БАССР мәҙәниәте көндәрендә ҡатнаша (1969); ӨДСИ хоры — Бөтә Рәсәй вуздарының ғилми (ижади) йәмғиәттәре конкурсы лауреаты (1977). Б. етәкселегендә хор коллективтары репертуарында сит ил, урыҫ һәм башҡ. композиторҙары әҫәрҙәре. Уҡыусылары араһында М.Ә.Әхмәтзарипов, Р.Р.Ҡудашев, БР‑ҙың атҡаҙанған артисы Т.А.Кислицына, БР‑ҙың атҡаҙанған мәҙәниәт хеҙмәткәрҙәре Т.А.Андреева, Л.П.Амантаева, В.И.Тарасенков. 2‑се дәрәжә “Ватан алдында күрһәткән хеҙмәттәре өсөн” орденының миҙалы менән бүләкләнгән (2014).

  Әҫәрҙ.: Ученики об учителе //Александр Юрлов. М., 1983; Незабываемые годы. Уфа, 1998.

  Әҙәб.: Советские хоровые дирижёры: справ. М., 1986.

Ғ.Н.Әхмәҙиева

Тәрж. Г.Һ.Ризуанова