ВАХРОМЕЕВ Игорь Сергеевич
ВАХРОМЕЕВ Игорь Сергеевич (18.1.1924, Ярославль ҡ. — 16.1.1998, Өфө ҡ.), геолог. Геология‑минералогия фәндәре докторы (1973), профессор (1986). Б.В. һуғышында ҡатнашыусы. Свердловск тау институтын тамамлағандан һуң (1951) Учалы геологик разведка партияһында өлкән геолог булып эшләй; 1956 й. алып Иркутск һирәк һәм төҫлө металдар ҒТИ‑ның лаборатория начальнигы; 1959 й. башлап СССР ФА Урал бүлеге Башҡортостан фәнни үҙәгенең өлкән ғилми хеҙмәткәре, 1968 й. — лаборатория мөдире, 1986—91 йй. баш ғилми хеҙмәткәре. Фәнни эшмәкәрлеге Башҡортостандың көнсығыш өлөшөндәге магматизм процестарын өйрәнеүгә арналған. В. тарафынан колчедан ҡатламдарындағы субвулканик есемдәрҙең формалашыуына магматоген күсеүҙең йоғонтоһо һәм файҙалы ҡаҙылма ятҡылыҡта шыуҙырмаларының роле тураһындағы ҡараш үҫтерелгән.
Х е ҙ м.: Геолого-структурные позиции рудных месторождений в надвиговых зонах континентальной земной коры. Уфа, 1992.
А.А.Алексеев
Тәрж. Э.М.Юлбарисов