ВДОВЫКИН Геннадий Петрович

ВДОВЫКИН Геннадий Петрович (23.8.1937, БАССР‑ҙың Фёдоровка районы Веровка а. — 14.12.2010, Мәскәү ҡ.), геохимик. Геология‑минералогия фәндәре докторы (1976), профессор (2001). МДУ‑ны тамамлағандан һуң (1960) 1982 й. тиклем (өҙөклөк менән) Бөтә Союз тәбиғи газдар ҒТИ‑ның өлкән ғилми хеҙмәткәре, 1962—75 йй. В.И.Вернадский исемендәге Геохимия һәм аналитик химия институтында эшләй, 1982 й. алып Бөтә Союз нефть һәм газ сәнәғәтен ойоштороу, идара итеү һәм иҡтисад ҒТИ-ның өлкән ғилми хеҙмәткәре, сектор мөдире, баш ғилми хеҙмәткәре, 1992 й. — И.М.Губкин исемендәге Рәсәй нефть һәм газ университетының төп ғилми хеҙмәткәре, 1999—2000 йй. Г.А.Гамбурцев исемендәге Ер физикаһы институтының (бөтәһе лә — Мәскәү ҡ.) баш ғилми хеҙмәткәре. Фәнни эшмәкәрлеге Урыҫ һәм Көнсығыш Себер платформаларының, Кавказ алды һәм Урал алды бөгөлдәренең, Уралдың, Ҡырым һәм Манғышлаҡ ярымутрауҙарының геологик төҙөлөшөн һәм нефтле булыуын өйрәнеүгә бәйле. В. тарафынан боронғо платформаларҙағы трапп магматизмы тикшерелгән, Көнсығыш Себерҙәге Ер ҡабығының тәрәндәге ярығы картаға төшөрөлгән (Вдовыкин линеаменты), нефть һәм газ, нефть ятҡылыҡтарын эҙләүҙә геохимик ысулдар эшләнгән. 4 нефть ятҡылығын асыуҙа ҡатнашҡан. В.И.Вернадский исемендәге премия лауреаты (1969). В. исеме менән метеориттарҙың полимер органик матдәһе (вдовыкинит) аталған.

  Х е ҙ м.: Углеродистое вещество метеоритов. М., 1967; Введение в нефтегазовую геологию трапповых регионов. М., 1994; Глубинные разломы и нефтеносность. М., 2003.

  Әҙәб.: Б о н д а р е в И.М., Р у д н е в А.Н., С е  н ю к о в Р.В. Профессор Г.П.Вдовыкин, русский естествоиспытатель, энциклопедист. М., 2002.

Р.В.Сенюков

Тәрж. Э.М.Юлбарисов