ВОРОБЬЁВ Виктор Васильевич

ВОРОБЬЁВ Виктор Васильевич (25.6.1939, Павловский Посад ҡ. — 9.10.1991, Өфө ҡ.), тау инженер‑геологы. РСФСР‑ҙың атҡаҙанған геологы (1990). Төньяҡ Осетия тау‑металлургия институтын тамамлағандан һуң (Орджоникидзе ҡ., 1962) “Башкиргеология” ПБ‑нда эшләй: Переволочан геологик разведка экспедицияһы геологы, 1969 й. алып баш геологы, 1974 й. — Көнбайыш Башҡортостан комплекслы экспедицияһының геология‑иҡтисад партияһы начальнигы, 1978 й. — Мәғлүмәт‑хисаплау үҙәге начальнигы, 1986 й. — Башҡортостан геология‑геофизика экспедицияһының Соран партияһында бүлек мөдире, 1990 й. — баш геологы. Фәнни-производство эшмәкәрлеге Башҡортостанда, Ырымбур өлкәһендә һәм Көнбайыш Себерҙә төҫлө металдар эҙләү һәм разведкалауға бәйле. В. тарафынан республиканың баҡыр колчеданы ятҡылыҡтары запастарын иҫәпләү өсөн кондициялар эшләнгән. Октябрьский һәм Юбилейный баҡыр колчеданы ятҡылыҡтарын асыуҙа ҡатнашҡан. СССР‑ҙың Дәүләт премияһы лауреаты (1980). Хеҙмәт Ҡыҙыл Байраҡ ордены менән бүләкләнгән (1971). 

А.Л.Чернов

Тәрж. Э.М.Юлбарисов