ҒӘЙНАНОВ Адонис Ғарифйән улы

ҒӘЙНАНОВ Адонис Ғарифйән улы [27.1.1927, БАССР‑ҙың Мәсәғүт кантоны Өлкөндө а. (БР‑ҙың Дыуан районы) — 20.1.2012, Мәскәү ҡ.], геофизик. Геология‑минералогия фәндәре докторы (1976), профессор (1978). СССР‑ҙың ер аҫты разведкаһы отличнигы (1987). МДУ‑ны тамамлағандан һуң (1949) шунда уҡ эшләй. Фәнни эшмәкәрлеге океандағы ер ҡабығының тәрәндәге төҙөлөшөн өйрәнеүгә, акваториялар төбөндәге файҙалы ҡаҙылма ятҡылыҡтарын прогнозлауға арналған. Ғ. етәкселегендә Тымыҡ, Атлантик һәм Һинд океандары тектоносфераларының ҡалынлыҡ карталары һәм тығыҙлыҡ моделдәре төҙөлгән. Ғ. ҡатнашлығында Атлантик океандағы гравитация ҡырының көҙгөләгесә локаль симметрияһы күренеше асылған. М.В.Ломоносов исемендәге премия лауреаты (2003).

  Х е ҙ м.: Гравиметрические исследования земной коры океанов. М., 1980; Морская гравиразведка. М., 1991 (авторҙ.).

  Әҙәб.: Гайнанов Адонис Гарифьянович (60 лет со дня рождения) //Вестник Московского государственного университета. Серия: Геология. 1987. №3.

Тәрж. Э.М.Юлбарисов