ҒӘЛИМОВ Эрик Михайлович

ҒӘЛИМОВ Эрик Михайлович (29.7.1936, Владивосток ҡ. — 23.11.2020, Мәскәү ҡ.), геохимик. РФА академигы (1994), БР ФА‑ның почётлы академигы (2002), геология‑минералогия фәндәре докторы (1970), профессор (1982). И.М.Губкин исемендәге Мәскәү нефтехимия һәм газ сәнәғәте институтын тамамлаған (1959). Фәнни эшмәкәрлеге геохимия, Ай һәм планеталарҙың барлыҡҡа килеүе, Ерҙең химик эволюцияһы өлкәһендәге тикшеренеүҙәргә бәйле. Ғ. ҡатнашлығында спинлы изотоп эффекты асылған. “Углеродтың тотороҡло изотоптар геохимияһы” ғилми йүнәлешенә нигеҙ һалыусы. “Геохимия” журналының баш мөхәррире (2004 й. алып). Халыҡ-ара геохимия һәм космохимия ассоциацияһы президенты (2000—04), Айҙы өйрәнеү буйынса халыҡ-ара эшсе төркөм рәйесе (1996—98), РФА‑ның Метеориттар комитеты рәйесе (2003 й. алып). В.И.Вернадский исемендәге премия лауреаты (1984). “Почёт Билдәһе” (1986), Почёт (1999) ордендары менән бүләкләнгән.

  Хеҙм.: Замыслы и просчёты. Фундаментальные космические исследования в России последнего двадцатилетия. Двадцать лет бесплодных усилий. М, 2010; Кому нужны лунные камни?: выступления, интервью, научно‑популярные публикации: 50 лет в науке. М., 2012.

М.А.Камалетдинов

Тәрж. Э.М.Юлбарисов