ОЛО ӘҮЖӘН, йылға

ОЛО ӘҮЖӘН, йылға, Ағиҙел й. уң ҡушылдығы. Баштау һыртындағы Ҡараташ тауының көнсығыш итәгендә башлана. Белорет р‑ны буйлап үрге ағымында 15 км төньяҡ һәм төньяҡ‑көнбайышҡа аға, Туҡан а. көнсығышҡа табан 8 км алыҫлыҡта көньяҡҡа борола һәм Ағиҙел й. (тамағынан 1175 км алыҫлыҡта) ҡоя. Оҙонлоғо яҡынса 92 км, басс. майҙаны 124 км². Башлыса ҡар һыуы м‑н туйына. Үрге Әүжән а. эргәһендәге быуаға тиклем уртаса йыллыҡ һыу сығымы яҡынса 18 м³/с. Басс. рельефы таулы. Үрге ағымда үҙәне киң (800—1000 м), урыны м‑н һаҙлы, һөҙәк битләүҙәр бар; түбәнге ағымда — тар, ярҙары текә һәм ҡаялы. Үрге һәм урта ағымында йылға ныҡ бөгөлләнә. Ландшафы кәҫле көлһыу тупраҡтағы ҡайын‑ҡарағай һәм ҡайын‑ҡарағай‑ҡарағас урмандарынан, урта һәм түбәнге ағымда ылыҫлы урман урынында барлыҡҡа килгән төрлө үләнле сағыл болондарҙан тора. Басс. 80%‑тан ашыуын урман ҡаплаған, яҡынса 5%‑ы һаҙланған. Ҡушылдыҡтары: уң — Ҡарайылға, Беҙәк, Ҡурғашлы, Бағрышты; һул — Кесе Әүжән һ.б.

И.М.Япаров

Тәрж. А.Н.Күсеев