АБАКУМОВ Алексей Алексеевич

АБАКУМОВ Алексей Алексеевич (20.9.1946, Ишембай ҡ. — 14.11.2021, Обнинск ҡ.), инженер‑радиоэлектроник. Техник фәндәр докторы (1985), профессор (1987). РФ‑тың почётлы юғары профессиональ белем биреү хеҙмәткәре (2013). Томск радиоэлектроника һәм электрон техника институтын тамамлаған (1969). 1967 й. алып Салауат нефтехимия комбинатында, 1968 й. — “Ишимбайнефть” нефть промыслаһы идаралығында эшләй. 1969 й. башлап Ишембай нефть техникумында, 1972 й. — ӨНИ‑нең Салауат филиалында уҡыта, 1986 й. алып ӨНИ‑нең электротехника кафедраһы мөдире. 1987—2016 йй. “МИФИ” Ядро милли тикшеренеү университеты филиалы — Обнинск атом энергетикаһы институтының электротехника һәм электроника кафедраһы мөдире, бер үк ваҡытта 1999 й. алып “Интроско” үткәргес торбаларҙы диагностикалау үҙәгенең (Обнинск ҡ.) генераль директоры. Фәнни эшмәкәрлеге емермәүсе контролдең электр‑магнит ысулдарына (ҡара: Дефектоскопия) арналған. А. тарафынан магнитлы интроскопия ысулы, дефекттар һүрәтен эшкәртеү, уларҙың геометрик параметрҙарын иҫәпләү һ.б. өсөн телевизион иҫәпләү саралары эшләнгән.

  Хеҙм.: Магнитная диагностика газонефтепроводов. М., 2001 (авторҙ.); Зарождение магнитоскопии подземных трубопроводов: воспоминания. М., 2005.

В.А.Потеряхин

Тәрж. Г.Ҡ.Ҡунафина