БИКСУРИН Алик Сәлих улы

БИКСУРИН Алик Сәлих улы (21.9.1937, БАССР‑ҙың Ҡыйғы районы Үрге Ҡыйғы а. — 20.10.2021, Санкт‑Петербург ҡ.), балет артисы, театр эшмәкәре. БАССР‑ҙың атҡаҙанған артисы (1969). Ленинград хореография училищеһын (1956; педагогы А.Л.Кумысников), БДУ‑ны (1975) тамамлаған. 1956—76 йй. Башҡ. дәүләт опера һәм балет театры солисы, 1988—90 йй. директоры, 1976 й. алып Башҡортостан профсоюздар өлкә комитетының бүлек мөдире, 1985—2008 йй. Р.Нуриев исемендәге Башҡ. хореография училищеһы директоры. Классик бейеүсе булараҡ, Б. бейеүгә тәбиғи рәүештә ирекле пластика, эксцентриада индерә. Артист сәнғәтендә романтик патетика, мелодрама элементтары сағыла. Төп партиялары: Колен (“Файҙаһыҙ һаҡлыҡ” — “Тщетная предосторожность”, П.Гертель; дебют, 1957), Альберт (“Жизель”, А.Адан), Ромео (“Ромео һәм Джульетта” — “Ромео и Джульетта”, С.С.Прокофьев), Конрад (“Корсар”, Л.Ф.Минкус), Закир (“Ҡара йөҙҙәр” — “Черноликие”, Х.Ш.Заимов һәм А.Г.Чугаев). Концерт репертуарында К.Глюк, Х.Ш.Заимов, Ф.Шопен, Ф.Лист музыкаһына хореографик миниатюралар. Мәскәү ҡ. үткән Башҡорт әҙәбиәте һәм сәнғәте декадаһында ҡатнашҡан (1955).

Һ.С.Сәйетов

Тәрж. Г.С.Балтабаева