БАРИТ, минерал
БАРИТ, ауыр шпат, сульфаттар класы минералы, BaSO4; составында стронций, кальций, ҡурғаш ҡушылмалары булыуы мөмкин. Кристалдары пластинка йәки призма рәүешендә. Текстураһы киң, ҡаты бөртөклө, һыҙыҡлы. Төҫө аҡ, һоро, зәңгәрһыу, төҫһөҙ һ.б.; ҡатылығы — 3,0—3,5, тығыҙлығы — 4500 кг/ м3 яҡын. Быяла кеүек ялтыр, йәбешмәлеге камил. Барий тоҙҙарын алыу өсөн, быраулау иретмәләрен ауырайтҡыс сифатында, лак-буяу сәнәғәтендә һ.б. ҡулланыла. Башҡортостанда Б. ятыштары урта һәм өҫкө рифейҙа (Берәтәк, Ирлән һәм Ҡужа ятҡылыҡтары) һәм баҡыр колчеданы ятҡылыҡтарының (Сибай, Учалы һ.б. ятҡылыҡтар) окисланыу зоналарында билдәле.
Әҙәб.: Казаков Р.С. Баритовые месторождения на Южном Урале //Разведка и охрана недр. 1973. №2; Минерально-производственный комплекс неметаллических полезных ископаемых Республики Башкортостан. Казань, 1999.
А.А.Алексеев
Тәрж. Э.М.Юлбарисов