БИКБОВ Мөхәррәм Мөхтәрәм улы

БИКБОВ Мөхәррәм Мөхтәрәм улы (4.4.1957, Ырымбур өлкәһе Иманғол а.), офтальмолог. БР ФА‑ның мөхбир ағзаһы (2016), медицина фәндәре докторы (1998), профессор (2009). РФ‑тың (2013) һәм БР‑ҙың (1996) атҡаҙанған табибы. БДМИ‑ны тамамлағандан һуң (1980) Күмертау ҡ. эшләй. 1985 й. алып Өфө күҙ ауырыуҙары ҒТИ‑нда: 1986 й. башлап бүлек мөдире, 1991 й. — бүлек етәксеһе, 1998 й. — иҡтисад һәм фәнни‑производство эшмәкәрлеге буйынса директор урынбаҫары, 2006 й. — директор. Фәнни эшмәкәрлеге балаларҙа юғары дәрәжә анизометропияны төҙәтеүҙең оптик һәм хирургик ысулдарын тикшереүгә, тыумыштан һәм тормошта барлыҡҡа килгән күҙ мөгөҙсәһе ауырыуҙарын дауалау алымдарын эшләүгә арналған. Б. республикала тәүге тапҡыр күҙҙең мөгөҙсә ҡатламына рефракция операциялары яһау ысулын индерә. Рәсәй офтальмологтары йәмғиәтенең Башҡортостан төбәк бүлексәһе рәйесе (2009 й. алып). БР‑ҙың фән һәм техника өлкәһендәге Дәүләт премияһы (2022), Башҡортостан комсомолы премияһы (1987), БР ФА‑ның Ғ.Х.Ҡоҙаяров исемендәге премияһы (2013) лауреаты.

  Х е ҙ м.: Возрастная макулярная дегенерация. М., 2013 (авторҙ.); Конъюнктивиты: дифференциальная диагностика и лечение. М., 2015 (авторҙ.); Swept-Source оптическая когерентная томография сетчатки: атлас. М., 2019 (авторҙ.).

Тәрж. Г.Ҡ.Ҡунафина