БАШКИРСКИЙ МЕСТНЫЙ, ҡылсыҡһыҙ ваҡ күстерә сорты

БАШКИРСКИЙ МЕСТНЫЙ, ҡылсыҡһыҙ ваҡ күстерә сорты. 1940—43 йй. ҡылсыҡһыҙ ваҡ күстерәнең урындағы популяцияһынан Х.Н.Фәтҡуллин (Башҡ‑н дәүләт селекция ст.; ҡара: Шишмә тәжрибә‑производство хужалығы) тарафынан сығарылған. Һабағы 1,2 м тиклем бейеклектә, төҙ, йығылмай, йомшаҡ ҡыуаҡ. Япраҡлылығы яҡынса 60%. Сәскәлеге — тармаҡлы, ҡылсыҡһыҙ һепертке. Орлоғо асыҡ көрән. 1000 орлоғоноң ауырлығы 3—4 г. Ҡышҡа, ҡоролоҡҡа сыҙамлы, яҙын һәм сабып алынғандан һуң яҡшы үҫә. Уңдырышлылығы (ц/ га): йәшел масса — 120,0, бесән — 18,0, орлоҡ — 0,9; йәшел массала (ҡоро матдәгә күсереп иҫәпләгәндә) 17,1% сей протеин, 26,4% клетчатка бар (Шишмә тәжрибә‑производство хужалығы, 1993). БАССР б‑са 1961 й. ҡулланылышҡа индерелгән,дала һәм урман‑дала ауыл хужалығы зоналарында үҫтерелә.

Р.З.Ғәлимуллин

Тәрж. М.Н.Моратшина