ҺЫУ ЙЫЙЫУ БАССЕЙНЫ

ҺЫУ ЙЫЙЫУ БАССЕЙНЫ, һыу йыйыу майҙаны, һыу йыйыу, ер өҫтөнөң һәм тупраҡ ҡатламының һыу айырғыс м‑н сикләнгән өлөшө, һыу унан һыу объектына ағып төшә. Ер өҫтө һәм ер аҫты Һ.й.б. айырыла, уларҙың сиктәре тап килмәүе мөмкин. Башҡортостан терр‑яһы Волга һәм Урал (Каспий диңгеҙе басс.), Обь (Төньяҡ Боҙло океан басс.) йылғаларының Һ.й.б. инә. Респ. сиктәрендә Волга й. һыу йыйыу майҙаны 114,2 мең км² (Ағиҙел, Беүә, Ыҡ һ.б. йылғаларҙың Һ.й.б.), Урал й. — 27,3 мең км² (Оло Ҡыҙыл, Таналыҡ, Һаҡмар һ.б. йылғаларҙың Һ.й.б.), Обь й. һыу йыйыу майҙаны 2,1 мең км² (Мейәс, Уй һ.б. йылғаларҙың Һ.й.б.) тәшкил итә. Респ. күлдәре араһында иң ҙур һыу йыйыу майҙанына Сыбаркүл (369,0 км²), Асылыкүл (106,0 км²), Атауҙы (69,8 км²) эйә.

Ә.М.Гәрәев

Тәрж. Р.Ғ.Ғилманов