ДЕНИСОВ Дмитрий Витальевич
ДЕНИСОВ Дмитрий Витальевич (5.7.1970, Өфө ҡ.), спортсы. Шайбалы хоккей буйынса Рәсәйҙең халыҡ-ара класлы спорт мастеры (1993). БР‑ҙың күренекле спортсыһы (1994). Силәбе физик культура институтын тамамлаған (1994). “Салауат Юлаев” СДЮСШОР‑ы тәрбиәләнеүсеһе (тренерҙары В.Н.Денисов, Ф.С.Карюков). “Салауат Юлаев” (1987—95, 1998—99), “Северсталь” (Череповец ҡ., 1999—2002), “Крылья Советов” (Мәскәү ҡ., 2002—03) хоккей клубтары, Швейцария (1995—96), Швеция (1996—97), Чехия (1997—98) клубтары өсөн уйнай. Халыҡ‑ара хоккей федерацияһы кубогын яулаусы (1994), Милләт‑ара хоккей лигаһы (1995) һәм Рәсәй (2001) чемпионаттарының бронза призёры. “Известия” (“Хәбәрҙәр”) гәзите призына халыҡ‑ара турнир еңеүсеһе (1992—93). Олимпия уйындарында ҡатнашыусы (1994). Рәсәй йыйылма командаһы ағзаһы (1992—95). 2015 й. алып “Торос” хоккей клубының баш менеджеры (Нефтекама ҡ.), 2019 й. — “Сочи” хоккей клубының селекция эше буйынса менеджеры.
Тәрж. Г.Ҡ.Ҡунафина