КВАШНИН Анатолий Васильевич

КВАШНИН Анатолий Васильевич (15.8.1946, Өфө ҡ. — 7.1.2022, Мәскәү ҡ., Мытищи ҡ. ерләнгән), хәрби һәм дәүләт эшмәкәре. Хәрби фәндәр докторы (2003), социология фәндәре кандидаты (1996). Армия генералы (1997). РФ‑тың 1‑се класлы действительный дәүләт советнигы (2004). Рәсәй Федерацияһы Геройы (1999). Ҡурған машиналар эшләү институтын (1968), Бронетанк ғәскәрҙәре хәрби академияһын (1976) һәм СССР Ҡораллы көстәре Генераль штабының Хәрби академияһын (1989; икеһе лә — Мәскәү ҡ.) тамамлаған. 1969 й. алып Совет армияһында, 1992 й. — Рәсәй армияһында. Төркөстан хәрби округында, Үҙәк ғәскәрҙәр төркөмөндә, Урта Азия, Белоруссия һәм Төньяҡ Кавказ хәрби округтарында хеҙмәт итә. 1982—87 йй. 78‑се танк дивизияһы командиры, 1989 й. башлап 28‑се дөйөм ғәскәри армия командующийының 1‑се урынбаҫары, 1992 й. — 7‑се танк армияһы командующийы. 1993 й. алып РФ Ҡораллы көстәре Генераль штабының Баш оператив идаралығы начальнигы урынбаҫары, бер үк ваҡытта 1994 й. — Чечен Республикаһында берләшкән федераль ғәскәрҙәр төркөмө командующийы. 1995 й. алып Төньяҡ Кавказ хәрби округы ғәскәрҙәре командующийы. 1997 й. башлап РФ Ҡораллы көстәре Генераль штабы начальнигы — РФ оборона министрының 1‑се урынбаҫары. Герой исеменә армия генералы К. 1999 й. Төньяҡ Кавказда терроризмға ҡаршы көрәш операцияһын уңышлы үткәргәне өсөн лайыҡ була. 2004—10 йй. РФ Президентының Себер федераль округындағы тулы хоҡуҡлы вәкиле. 2011 й. алып отставкала. 3‑сө дәрәжә “СССР Ҡораллы көстәрендә Тыуған илгә хеҙмәт иткәне өсөн” (1980), 2‑се (2010), 3‑сө (2004) һәм 4‑се (2001) дәрәжә “Ватан алдында күрһәткән хеҙмәттәре өсөн”, Александр Невский (2016), Батырлыҡ (1995), Почёт (2006) ордендары, сит ил ордендары менән бүләкләнгән.

Әҙәб.: Трошев Г. Моя война: (записки окопного генерала). М., 2001.

Ғ.Һ.Булатов, Е.А.Смирнов

Тәрж. М.Х.Хужин