ЗИГЗАГ МӘМЕРЙӘҺЕ
ЗИГЗАГ МӘМЕРЙӘҺЕ, Ҡотоҡ төбәгендә урынлашҡан. Карст мәмерйәһе, девондың фран ярусы эзбизташы һәм доломитында барлыҡҡа килгән. Оҙонлоғо 2500 м, тәрәнлеге 120 м, майҙаны 9475 м2, күләме 37900 м3. Мәмерйә ауыҙы 1 м һәм 3 м диам. 2 ярыҡтан тора, Ҡотоҡ й. (Ағиҙел й. басс.) сағылының һул битләүендә урынлашҡан. Унан көньяҡҡа табан һарҡыу юл (оҙонлоғо яҡынса 400 м, киңлеге 2—3 м, бейеклеге 2—15 м) китә, 110 м тәрәнлектә ул көньяҡ йүнәлештәге тармаҡлы төп галерея (оҙонлоғо яҡынса 1000 м, киңлеге 5—8 м, бейеклеге 2—10 м) м‑н тоташа. Галерея буйлап һыу сығымы 50—250 л/с булған йылға (мәмерйә ауыҙынан төньяҡҡа табан 1 км алыҫлыҡта йырынға ағып төшкән Ҡотоҡ й. дауамы, тип фараз ителә) аға. Мәмерйәлә сталагмиттар, сталактиттар, сталагнаттар күп. Һауа т‑раһы йәйен 9°С, ҡышын 6°С, февр.—мартта мәмерйәнең ауыҙ өлөшө туңа. З.м. ярғанаттар, йылғала балыҡтар йәшәй.
Ю.В.Соколов
Тәрж. З.Б.Латипова