КРАСНОВ Сергей Борисович

КРАСНОВ Сергей Борисович (31.8.1948, Өфө ҡ. — 16.6.2020, шунда уҡ), рәссам. Рәсәй художество академияһы академигы (2007). БР‑ҙың халыҡ (2008) һәм атҡаҙанған (1998) рәссамы. Рәссамдар союзы ағзаһы (1976). 1964—66 йй. 2‑се Өфө педагогия училищеһында уҡый. 1978—81 йй. СССР Художество академияһында (Мәскәү ҡ.; етәкселәре Е.А.Кибрик, О.Г.Верейский) стажировка үтә. 2004—2008 йй. Халыҡ‑ара рәссамдар федерацияһының Төбәк йәмәғәт ойошмаһы — БР рәссамдары ижади союзы идараһы рәйесе.

  Башҡортостан һынлы сәнғәтендә “аналитик йүнәлеш” һәм метафизик романтизм вәкиле булараҡ билдәле. Уның тәүге эштәрендә үк (“Хәтер”, 1975) тәрән йөкмәтке, һүрәттең һәм композицияның график аныҡлығы күренә. Әҫәрҙәренең образдар структураһы фантастик реализмға хас булған метафора һәм һүрәтләүҙең реалистик синтезында ҡорола (“Мөрәжәғәт”, 1986; “Аллалар һәм һынташтар”, 2003; “Еваның төштәре”, “Алыҫ илгә сәйәхәт” (икеһе лә — 2006). Картиналарының төп темаһы: экологик (“Осҡан утрауға мәҙхиә”, 1983; “Атомлы ҡала”, 1986) һәм ижтимағи‑сәйәси  [“Геноцид нигеҙе” триптихы (“Геноцид нигеҙе”, “Коба моделе”, “Кампанеллаға реквием”), 1987] мәсьәләләр, цивилизацияларҙың һыйышып йәшәүе, кеше тормошоноң һәм прогресының асылы (“Монар”, 1991; “Гудзондағы һынташтар”, 1999; “Юғалған архипелагтар”, 2004; “Йыһанды барлыҡҡа килтергән күбәләк”, 2007). “Март” (1989; ҡара: Художество төркөмдәре һәм берекмәләре) ижади төркөмө ағзаһы. Модена ҡ. “Яңы альянс” урыҫ‑итальян художество галереяһын ойоштороу инициаторҙарының береһе (2004, Италия). 1972 й. алып күргәҙмәләрҙә ҡатнашҡан. 10‑дан ашыу шәхси күргәҙмәһе (1982 й. алып) Өфө, Монтегранаро, Чивитанова‑Марке, Модена (бөтәһе лә — Италия), Мәскәү, Джерси-Сити (АҠШ) ҡҡ. үтә. Эштәре БДХМ (Өфө ҡ.), Третьяков галереяһы, Рәсәй художество академияһы, Хәҙерге заман сәнғәте галереяһы (бөтәһе лә — Мәскәү ҡ.), Удмурт Республикаһы һынлы сәнғәт музейы (Ижевск ҡ.), М.А.Врубель исемендәге Омск өлкә һынлы сәнғәт музейы һ.б. галереялар коллекцияларында, Рәсәйҙә һәм сит илдәрҙә шәхси йыйылмаларҙа һаҡлана. Ғ.Сәләм исемендәге премия лауреаты (1988).

  Әҙәб.: Творческий фонд России: энциклопедия современного искусства (к 850-летию Москвы). М., 1996; Изобразительное искусство Республики Башкортостан: альбом-кат. /авт.‑сост. И.Н.Оськина, М.О.Садыкова. Уфа, 2007.

И.Н.Оськина

Тәрж. Г.Һ.Ризуанова