ИШЕМҒОЛОВ Дамир Нуретдин улы

ИШЕМҒОЛОВ Дамир Нуретдин улы (1.2.1943, БАССР‑ҙың Хәйбулла р‑ны Бәләкәй Әбеш а.), рәссам. БР‑ҙың халыҡ (2014)  һәм атҡ. (2001) рәссамы. Рәссамдар союзы ағзаһы (1993). С.Н.Ишемғоловтың ҡустыһы. Өфө сәнғәт уч‑щеһын тамамлаған (1971; педагогтары Л.Ф.Мөғтәбаров, К.П.Чаругин). 1975—95 йй. Башҡ‑н ижади-производство комб‑ты рәссамы, 1996—2010 йй. Өфө сәнғәт уч‑щеһында уҡыта. Ижадында өҫтөнлөк иткән неопримитивизм (ҡара: Һынлы сәнғәттә реалистик булмаған ағымдар) һыҙаттары эштәренең стилистикаһында һәм образдарҙы сағылдырыуҙа күҙәтелә. Уларға киңлекте тарайтыу, тупаҫыраҡ пластика һәм кеше фигураларын боҙоп һүрәтләү хас; төҫлө таптарҙы ҡаршы ҡуйыу, уларҙы ритмлы аралаштырыу предметтарҙың һәм фигураларҙың контурын асыҡлай. Башлыса жанрлы мотивтарға мөрәжәғәт итә: “Бушап ҡалған ауыл” (1977), “Бесән өҫтө” (1988), “Ҡорбан” (1991), “Юғалған кәзәне эҙләү” (1992). Байтаҡ эштәрендә авторҙың тарих, ваҡыт ағышы, кеше хәтеренең тотороҡлолоғо т‑да уйланыуҙары сағылыш таба: “Тәүлек”, “Тышалған ат” (икеһе лә — 1991), “Атай-әсәй иҫтәлегенә” (1993), “Реквием” (1994), “Лампалы кеше” (2016). Башҡорттарҙың милли үҙенсәлектәре, рухи ҡимәттәре “Һыу юлы”, “Ғаилә” (икеһе лә — 2008), “Әбеш”, “Тыуған йорт” (икеһе лә — 2012) картиналарында сағылыш таба.  “Инйәр” (1989), “Һары бейә” (1989) ижади төркөмдәре, “Артыш” ижади берекмәһе (1995; ҡара: Художество төркөмдәре һәм берекмәләре) ағзаһы. 1982 й. алып күргәҙмәләрҙә ҡатнаша. Шәхси күргәҙмәләре — Өфө (1996, 2008, 2013). Эштәре БДХМ, “Урал” галереяһы (ҡара: Һынлы сәнғәт галереялары), Ш.Мәржәни ис. Фәнни һәм мәҙәни программаларға булышлыҡ итеү һәм үҫтереү фонды (Мәскәү),  Силәбе, Новосибирск картиналар галереялары коллекцияларында һ.б., Рәсәйҙә һәм сит илдәрҙә шәхси йыйылмаларҙа һаҡлана.

Әҙәб.: Дамир Ишемгулов. Живопись. Графика: каталог/авт.‑сост. С.В.Евсеева. Уфа, 1996.

Тәрж. Г.Һ.Ризуанова