КӘРИМОВА Роза Шәйхетдин ҡыҙы

КӘРИМОВА Роза Шәйхетдин ҡыҙы (7.11.1935, БАССР‑ҙың Нуриман районы Иҫке Күл а. — 11.8.2020, Өфө ҡ.), актриса. РСФСР‑ҙың атҡаҙанған (1985), БАССР‑ҙың халыҡ (1977) һәм атҡаҙанған (1972) артисы. Театр эшмәкәрҙәре союзы ағзаһы (1961). Дәүләт театр сәнғәте институтын тамамлағандан һуң (1959; Б.В.Бибиков һәм О.И.Пыжова курсы) Башҡ. академия драма театры, 1989—95 йй. БР Милли Йәштәр театры актрисаһы.

  Башҡорт драма театрында актриса лирик‑драматик, комик‑сатирик ролдәрҙе лә берҙәй уңышлы башҡара: Люся (“Эҙләнеү йылдары” – “Годы странствий”, А.Н.Арбузов; дебют, 1959), Ғилминур (“Әсәләр көтәләр улдарын”, Ә.М.Мирзаһитов), Хәҙисә (“Ҡыҙыл паша”, Н.Асанбаев), Бимаза (“Диктаторға ат бирегеҙ!”, М.Кәрим); Милли Йәштәр театрында — Палапан (“Иҙеүкәй менән Мораҙым”, М.А.Буранғолов), Кукушкина (“Төшөмлө урын” – “Доходное место”, А.Н.Островский), Макпал (“Мөхәббәт тураһында легенда” – “Легенда о любви”, Г.М.Мусрепов). Актрисаның таланты классик репертуар ролдәрендә айырыуса тулы асыла: Джульетта (“Ромео һәм Джульетта” – “Ромео и Джульетта”, У.Шекспир), Нина Заречная (“Аҡсарлаҡ” – “Чайка”, А.П.Чехов), Надежда Коломийцева (“Һуңғылар” – “Последние”, М.Горький) һ.б.

З.В.Сәйфуллина

Тәрж. Г.Һ.Ризуанова