ЕРЕК, Мәләүез р‑нындағы ауыл

ЕРЕК, Мәләүез р‑нындағы ауыл, Әбет а/с ҡарай. Район үҙәгенән һәм Мәләүез т. юл ст. Т.‑Көнс. табан 35 км алыҫлыҡта урынлашҡан. Халҡы: 1906 й. — 138 кеше; 1929 — 169; 1939 — 155; 1959 — 253; 1989 — 197; 2002 — 145; 2010 — 180 кеше. Башҡорттар йәшәй (2002). Фельдшер‑акушерлыҡ пункты, клуб бар.

Ауылға 19 б. уртаһында Стәрлетамаҡ өйәҙе Сәнкем‑Ҡыпсаҡ улусы Түб. Таш а. башҡорттары үҙ ерҙәрендә нигеҙ һала. 1865 й. (Түб. Таш а. халҡы м‑н бергә иҫәпкә алына) 37 йортта 302 кеше йәшәгән. Игенселек, малс‑ҡ, умарт‑ҡ, тәгәрмәс һәм туғын яһау, урман кәсебе м‑н шөғөлләнгәндәр. Мәсет, училище булған. 1906 й. мөгәзәй теркәлгән.

Тәрж. Р.Ғ.Ғилманов