МИҺРАНОВ Марат Ғәлихан улы

МИҺРАНОВ Марат Ғәлихан улы (6.4.1955, Өфө ҡ.), зоолог. Биология фәндәре докторы (2000), профессор (2003). БР‑ҙың атҡаҙанған мәғариф хеҙмәткәре (2007), БР‑ҙың мәғариф отличнигы (2002). Н.Ғ.Миһрановтың ҡустыһы. БДУ‑ны тамамлағандан һуң (1977) Биология институтында, 1981 й. алып Биохимия һәм цитохимия бүлегендә эшләй: 1986 й. башлап өлкән ғилми хеҙмәткәр, 1994 й. — лаборатория мөдире. 1997 й. алып БДПУ‑ла уҡыта (2016 й. тиклем биоэкология һәм биология буйынса белем биреү кафедраһы мөдире). Фәнни хеҙмәттәре Башҡортостан бөжәктәренең төр составын, систематикаһын, биологияһын, экологияһын өйрәнеүгә һәм уларҙы һаҡлауға арналған. М. тарафынан көндөҙгө күбәләктәрҙең 180‑дән ашыу төрө асыҡланған һәм тикшерелгән, пестицидтарҙың тупраҡтағы умыртҡаһыҙҙарға тәьҫире өйрәнелгән. М. ҡатнашлығында Баверсан препараты (пиретроидтар рәтенә ҡараған инсектицид) эшләнгән.

  Х е ҙ м.: Булавоусые чешуекрылые Башкирии: (определитель). Уфа, 1991; Инсектициды и биота почв. Уфа, 1998 (авторҙ.); Животные Башкортостана. Уфа, 2016 (авторҙ.).

Тәрж. Г.А.Миһранова