ИЛЬЯСОВ Барый Ғәле улы

ИЛЬЯСОВ Барый Ғәле улы (13.6.1939, БАССР‑ҙың Хәйбулла районы Бүребай ҡсб), инженер‑электромеханик. БР ФА‑ның мөхбир ағзаһы (2006), техник фәндәр докторы (1983), профессор (1985). РФ‑тың (1994) һәм БР‑ҙың (1990) атҡаҙанған фән һәм техника эшмәкәре, БАССР‑ҙың атҡаҙанған уйлап табыусыһы (1980), РФ‑тың почётлы юғары профессиональ белем биреү хеҙмәткәре (2008), СССР‑ҙың уйлап табыусыһы (1985). Мәскәү авиация институтын тамамлағандан һуң (1962) Өфө машиналар эшләү буйынса “Союз” КБ‑нда эшләй. 1971 й. алып ӨДАТУ-ла уҡыта: 1980—2014 йй. техник кибернетика кафедраһы мөдире, бер үк ваҡытта 1988 й. башлап информатика һәм робот техникаһы факультеты деканы, 1989—90 йй. фәнни эштәр буйынса проректор; бер үк ваҡытта 1992 й. алып Механика институтында директор урынбаҫары, 1994—2010 йй. лаборатория мөдире. Фәнни тикшеренеүҙәре төрлө физик тәбиғәтле ҡатмарлы объекттар менән идара итеү теорияһына, ш. иҫ. макроэкономик системала идара итеүҙең интеллектуаль системаларына, арналған. Тикшеренеүҙәренең һөҙөмтәләре БР‑ҙың, РФ‑тың авиация сәнәғәте предприятиеларында индерелгән. Р.Р.Мәүлитов исемендәге премия лауреаты (2005). “Башҡортостан Республикаһында күрһәткән хеҙмәттәре өсөн” ордены менән бүләкләнгән (2021).

  Хеҙм.: Проблемы управления сложными динамическими объектами в критических ситуациях на основе знаний. М., 2003 (авторҙ.); Нейрокомпьютеры в авиации (самолёты). М., 2004 (авторҙ.); Интеллектуальные системы управления. Теория и практика. М., 2009 (авторҙ.).

Тәрж. Р.Ғ.Ғилманов