КИТМАНОВ Роальд Викторович
КИТМАНОВ Роальд Викторович (23.1.1930, Улан‑Батор ҡ. — 5.5.2007, Октябрьский ҡ.), тау инженеры. Техник фәндәр кандидаты (1978). И.М.Губкин исемендәге Мәскәү нефть институтын тамамлағандан һуң (1957) Бөтә Союз нефть һәм газ сәнәғәтен комплекслы автоматлаштырыу ғилми‑тикшеренеү һәм проект-конструкторлыҡ институтының Октябрьский филиалында эшләй. 1962 й. алып Бөтә Союз геологик разведка скважиналарын геофизик өйрәнеү ғилми‑тикшеренеү һәм проект‑конструкторлыҡ институтында (Октябрьский ҡ.): 1975—79 йй. һәм 1986—88 йй. лаборатория мөдире, 1980 й. — ғилми секретарь, 1988—99 йй. баш ғилми хеҙмәткәр. Фәнни‑производство эшмәкәрлеге каротаж кабелгә беркетелгән приборҙар ярҙамында ер ҡатламдарын гидродинамик тикшереү һәм һынап ҡарау һөҙөмтәләренә интерпретация биреүҙең техник сараларын уйлап табыу, технологияларын, методикаһын асыҡлау менән бәйле. СССР‑ҙың Дәүләт премияһы лауреаты (1980).
К.В.Антонов
Тәрж. Л.Ф.Мәмбәтҡолова