КОВАЛЕНКО Константин Иосифович
КОВАЛЕНКО Константин Иосифович (14.1.1912, Екатеринослав губернаһы Юзовка ҡсб — 23.11.1988, Мәскәү ҡ.), инженер‑нефтсе. Техник фәндәр кандидаты (1964). РСФСР‑ҙың атҡаҙанған фән һәм техника эшмәкәре (1957), СССР-ҙың почётлы нефтсеһе (1971). И.М.Губкин исемендәге Мәскәү нефть институтын тамамлағандан һуң (1940) “Ишимбайнефть” тресында эшләй (өҙөклөк менән): инженер‑конструктор, баш механик, 1946 й. алып идарасы, 1943 й. — “Ишимбайгаз” тресының баш инженеры, идарасыһы, 1945 й. һәм 1954—65 йй. “Башнефть” берекмәһенең баш инженеры, начальнигы. 1952 й. башлап “Октябрьскнефть” тресы идарасыһы. Фәнни‑производство эшмәкәрлеге республиканың нефть ятҡылыҡтарын һәм газ ятҡылыҡтарын үҙләштереүгә бәйле. К. етәкселегендә ҡатламдарҙың нефть биреүсәнлеген арттырыу ысулдары: һыу ебәреү, продуктив ҡатламдарға реагенттар ҡыуҙырыу, скважиналарҙы вышкаһыҙ эксплуатациялау индерелгән. Ленин (1959, 1966), Хеҙмәт Ҡыҙыл Байраҡ (1948) ордендары менән бүләкләнгән.
К.С.Баймөхәмәтов
Тәрж. Л.Ф.Мәмбәтҡолова