КОМАРОВ Владимир Леонидович
КОМАРОВ Владимир Леонидович (23.9.1930, Чита ҡ. — 2.9.1974, Өфө ҡ.), геолог‑геофизик. Геология‑минералогия фәндәре докторы (1972). Ҡазан университетын тамамлаған (1954). 1957 й. алып Бөтә Союз геофизика ҒТИ‑ның Волга‑Урал филиалында эшләй, 1959 й. — Өфө ҒТИ‑нда лаборатория мөдире, 1970 й. — Бөтә Союз нефть промыслалары геофизикаһы ҒТИ‑нда директор урынбаҫары (бөтәһе лә — Өфө ҡ.). Фәнни эшмәкәрлеге Волга‑Урал нефтле һәм газлы провинцияһы ятҡылыҡтары нефть һәм газ коллекторҙарының петрофизик үҙенсәлектәрен өйрәнеүгә арналған. К. тарафынан Арлан нефть ятҡылығын, Туймазы нефть ятҡылығын, Шкапов нефть ятҡылығын эшкәртеүҙе проектлауҙа ҡулланылған геофизик ысул комплекстары буйынса продуктив ҡатламдарҙы асыҡлау һәм баһалау, торба аралыҡтары аша механизацияланған скважиналарҙы өйрәнеү алымдары эшләнгән.
М.В.Семёнова
Тәрж. Л.Ф.Мәмбәтҡолова