Для авторизации на текущем портале в Вашем профиле ЕСИА должно быть заполнено поле "Электронная почта"

Инергə
Төбәк интерактив энциклопедик портал «Башҡортостан»
Башҡортостан Республикаһы Фәндәр академияһы Башҡортостан Республикаһы “Башҡорт энциклопедияһы” дәүләт автономиялы фән учреждениеһы

ЛЕСИН Василий Николаевич

Просмотров: 997

ЛЕСИН Василий Николаевич (1.2. 1943, БАССР‑ҙың Благовар районы Васильцовка а. — 13.5.2020, Өфө ҡ.), график. РФ‑тың (2008) һәм БР‑ҙың (2002) атҡаҙанған рәссамы. Рәссамдар союзы ағзаһы (1975). ӨАИ‑ны тамамлаған (1967). 20 б. 1970—90 йй. башлыса акварель техникаһында, 2000 йй. алып майлы буяулы рәсем сәнғәтендә эшләй. Ижадының тәүге осоронда индустриаль пейзажға мөрәжәғәт итә (“Радио мачталары”, 1971; “Яңы магистраль”, 1972). 80‑се йй. уртаһынан эштәре фәлсәфәүи йөкмәтке ала; сюжеттың, хәл ителешендәге тыйнаҡлыҡ, рәсем төшөрөү алымдары һәм колорит рәссамдың донъяға ҡарашы үҙгәреүен, киҫкенләшеүен күрһәтә. Әҫәрҙәре кинәйәле мәғәнә менән айырыла, пейзаж мотивтарында экология темаһы өҫтөнлөк ала, улар тәбиғәттең матурлығын түгел, ә ҡатмарлы социаль хәлдәр барған урындарҙы сағылдыра (“Яҙҙы хәбәр итеүсе”, 1987; “Ҡороған урман”, 1988). Күп эштәренең стилистикаһы шартлы пластикаға  (“Ҡоштар”, 1987; “Фигуралар”, 1988), абстракт-биҙәү композицияларына (“Америка” серияһы, 1993) нигеҙләнгән. Лирик реалистик пейзаждарында төҫ — образдың төп характеристикаһы булып тора (“Башҡортостан буйлап” серияһы, 1996 й. алып). 1972 й. алып күргәҙмәләрҙә ҡатнаша. Шәхси күргәҙмәләре: Өфө (1993, 2004), Нью-Бедфорд (1993), Атланта (2001; икеһе лә — АҠШ), Мёльн (ГФР, 1994). Эштәре Нестеров М.В. исемендәге художество музейында, ТР (Ҡазан ҡ.), Удмурт Республикаһының (Ижевск ҡ.) һынлы сәнғәт музейҙарында, Рәсәйҙә һәм сит илдәрҙә шәхси йыйылмаларҙа һаҡлана.

 Әҙәб.: Акварельная весна = Акварель яҙы: каталог /авт.‑сост. И.Н.Оськина. Уфа, 2005.

Тәрж. Г.Һ.Ризуанова

 

 

 

И.Н.Оськина
Дата публикации: 10.10.2019
Дата последнего обновления публикации: 14.04.2023