МУЛЛАГИЛДИН Ришат Усман улы

МУЛЛАГИЛДИН Ришат Усман улы (3.2.1969, Өфө ҡ. — 15.4.2022, шунда уҡ), архитектор. Рәсәй архитекторҙар союзы ағзаһы (1999). Мәскәү архитектура институтын тамамлаған (1995). Шибаур технологик институтында стажировка үтә һәм уҡый (1997—2000), Кейо университетында уҡый (2000—05; икеһе лә — Токио ҡ., етәксеһе Риичи Мияке). 1994 й. алып “Моспроект‑2” йәмәғәт биналарын һәм ҡоролмаларын проектлау буйынса идаралыҡ, 1997 й. — “Kajima Design”, 1998—99 йй. “Nihon Sekkei” проект фирмалары архитекторы, бер үк ваҡытта 1999—2001 йй. Шибаур технологик институтының (бөтәһе лә — Япония) архитектор-инструкторы, 2005—19 йй. “RAUM Architects” ЯСЙ президенты, бер үк ваҡытта 2008—20 йй. “RAUM Design” ЯСЙ, 2016 й. алып «“Киокусинкай” һаулыҡ һәм спорт үҙәге» директоры (бөтәһе лә — Өфө ҡ.).

Өфө ҡ. М. проекттары буйынса Ағиҙел й. уң ярының көньяҡ битләүендә ҡала төҙөлөшө эштәре башҡарылған (2005 й. алып), Конгресс-холл бинаһы төҙөлгән, “Аҡбуҙат” ипподромына реконструкция (икеһе лә — 2007; бөтәһе лә — Киоказу Араи менән берлектә, “Arai Architects”, Токио ҡ.) яһалған. Архитектура, ҡала төҙөлөшө һәм дизайндың актуаль мәсьәләләренә арналған фәнни хеҙмәт, күргәҙмә каталогтары, “Рәсәй архитектураһы буйынса белешмә” йыйынтығы (“Путеводитель по российской архитектуре”; Токио ҡ., 2002; япон телендә) авторы. “ARX Awards” (2006, 2007; икеһе лә — Мәскәү ҡ.), “AIDA Awards” (Токио ҡ., 2011) милли премияһы, БР‑ҙың Салауат Юлаев исемендәге Дәүләт премияһы (2008) лауреаты.

  Хеҙм.: В поиске архитектурных символов города //Архитектурный вестник. 2007. №2.

  Әҙәб.: Звёздные проекты “РАУМ Арчитектс” //Новый облик Республики Башкортостан: каталог. Уфа, 2008. 

Тәрж. Г.Һ.Ризуанова