МОРОЗКИН Николай Данилович

МОРОЗКИН Николай Данилович (27.11.1953, Мордва АССР‑ы Киржеманы а.), математик. Физика-математика фәндәре докторы (1996), профессор (1997). БР‑ҙың атҡаҙанған фән эшмәкәре (2004), РФ юғары мәктәбенең атҡаҙанған хеҙмәткәре (2011), РФ‑тың почётлы юғары профессиональ белем биреү хеҙмәткәре (2002). Мордва университетын тамамлаған (Саранск ҡ., 1975), 1980 й. алып шунда уҡ эшләй. 1983 й. башлап БДУ‑ла: 1993 й. — ғәмәли информатика һәм һанса ысулдары кафедраһы мөдире, бер үк ваҡытта 1997 й. — фәнни эштәр буйынса проректор, 2013 й. — ректор, 2022 й. алып президент. Фәнни эшмәкәрлеге математик моделдәр әҙерләү, информатика, оптималь идара итеү мәсьәләләренә, һанса ысулдар уйлап табыуға арналған. М. тарафынан һыҙыҡһыҙ ҡабарынҡы фаза сикләүҙәре булған тиҙ тәьҫир итеү мәсьәләләрен, төрлө технологик сикләүҙәрҙе һәм йылытыла торған изделиеларҙың ныҡлығы үҙенсәлектәрен иҫәпкә алып йылытыу менән оптималь идара итеү мәсьәләләрен сисеү ысулдары табылған. Салауат Юлаев ордены менән бүләкләнгән (2022).

  Хеҙм.: Численные приближения экстремалей управляемых динамических систем. Уфа, 1989 (авторҙ.); Оптимальное управление процессами нагрева с учётом фазовых ограничений. Уфа, 1997.

 Тәрж. Р.Ғ.Ғилманов