“МАГНЕЗИТ”, завод

“МАГНЕЗИТ”, утҡа сыҙамлы онтаҡтар һәм төп металлургия процестары өсөн әйберҙәр етештереү заводы. 1900 й. М.И.Маркусон, А.О. һәм Г.О.Немировскийҙар, А.Ф.Шуппе тарафынан Һатҡы заводы ерҙәрендә нигеҙ һалына. Хужалары: “Магнезит” ширҡәте, 1913 й. алып “Магнезит” АЙ; 1918 й. национализациялана. Златоуст тау заводы округына ингән. 1901 й. эшләй башлай. Камера мейесе, магнезит ваҡлар өсөн шарлы тирмәне, гидравлик пресы була. 1901 й. 610 т магнезит онтағы һәм 240 т магнезит кирбесе етештерә. 1910 й. заводта 324 эшсе иҫәпләнә, 11 мең т магнезит онтағы һәм 15,5 мең т магнезит кирбесе эшләп сығарыла. 1916 й. етештереү иң юғары кимәлгә етә: 71,4 мең т сей магнезит табыла, 31 мең т магнезит онтағы яндырыла, 10,4 мең т магнезит кирбесе етештерелә. “М.” продукцияһы Бөтә донъя күргәҙмәһендә (Льеж ҡ., 1905) алтын миҙалға лайыҡ була. 1993 й. алып «“Магнезит” комбинаты» утҡа сыҙамлы әйберҙәр етештереү ААЙ (Һатҡы ҡ.).

З.И.Гудкова

Тәрж. М.Х.Хужин