ТУРАЙ ИШӘЛИН

ТУРАЙ ИШӘЛИН, Крәҫтиәндәр һуғышында (1773—75) ҡатнашыусы, Е.И.Пугачёв полковнигы. Нуғай даруғаһының Ҫыбы‑Мең улусы башҡорто. Шул уҡ улустың сотнигы. Ихтилалға 1773 й. нояб. ҡушыла. Нуғай һәм Ҡазан даруғаларында баш күтәреүсе отрядтар ойоштора. Нояб. аҙағында Өфөнө ҡамауҙа һәм штурмлауҙа ҡатнаша, ҡаланы ирекле тапшырыу т‑да ҡамауҙағылар м‑н һөйләшеүҙәр алып барған. 1774 й. июнендә Буҙан Смаҡов, Ҡасҡын Һамаров, Ҡотлогилде Абдрахмановтар м‑н Өфө провинцияһының Бөгөлсән а. янында хөкүмәт ғәскәрҙәренә ҡаршы алыштарҙа ҡатнаша. Артабанғы яҙмышы билдәһеҙ.

Н.М.Ҡолбахтин

Тәрж. М.Х.Хужин