ТӘҮӘКӘН, Күгәрсен р‑нындағы ауыл

ТӘҮӘКӘН, C ә ң к е м, Күгәрсен р‑нындағы ауыл, Теләүембәт а/с ҡарай. Район үҙәгенән К.‑Көнб. 54 км һәм Мәләүез т. юл ст. К.‑Көнс. табан 77 км алыҫлыҡта Сәңке й. (Һаҡмар й. басс.) буйында урынлашҡан. Халҡы: 1900 й. — 430 кеше; 1920 — 496; 1939 — 465; 1959 — 551; 1989 — 378; 2002 — 467; 2010 —581 кеше. Башҡорттар йәшәй (2002). Урта мәктәп, балалар баҡсаһы, амбулатория, спорт‑һауыҡтырыу комплексы, мәҙәниәт йорто (“Сәңкем” халыҡ фольклор ансамбле), китапхана, мәсет бар.

Ауылға 18 б. уртаһында Нуғай даруғаһы Сәңкем‑Ҡыпсаҡ улусы башҡорттары үҙ ерҙәрендә нигеҙ һала. Тәүге төпләнеүсе Тәүәкән Йелебәков (Йембәков) исеме м‑н аталған. Икенсе исеме “сәңкем” этнонимына бәйле (ҡара: Ҡыпсаҡ). Шулай уҡ Ижәп, Кинйәп булараҡ теркәлгән. 1795 й. 19 йортта 86 кеше йәшәгән, 1866 й. 52 йортта — 335 кеше. Малс‑ҡ, игенселек м‑н шөғөлләнгәндәр. Мәсет булған. 1900 й. ш. уҡ һыу тирмәне теркәлгән. М.Ғ.Рәхимов, Ю.Р.Әбдрәхимов ошо ауылда тыуған.

Тәрж. Р.Ғ.Ғилманов