ЯМАЕВА Маһира Сәйҙел ҡыҙы
ЯМАЕВА Маһира Сәйҙел ҡыҙы [15.7.1918, Өфө губ. ш. уҡ исемле өйәҙе (БР‑ҙың Нуриман р‑ны) Иҫке Исай а. — 16.12.2003, Өфө], балет артисы. Башҡорт театр‑художество уч‑щеһын тамамлағандан һуң (1941; педагогы К.В.Матсон) 1963 й. тиклем БДОБТ‑ның солисы, бер үк ваҡытта 1959 й. алып балет студияһы уҡытыусыһы. 1963—88 йй. Өфөнөң төрлө үҙешмәкәр сәнғәт бейеү коллективтары етәксеһе. Я. бейеүҙәре муз. тәьҫирлелеге, үҙенсәлекле техника, юғары һикерештәр м‑н айырылып торған. Бөтә тәүге спектаклдәрҙә: “Баҡсаһарай фонтаны” (“Бахчисарайский фонтан”; Б.В. Асафьев), “Аҫау ҡолон‑Көмрө һырт” (“Конёк‑Горбунок”; Ч.Пуньи), “Файҙаһыҙ һаҡлыҡ” (“Тщетная предосторожность”; П.Гертель) балеттарында; “Фауст” (Ш.Гуно), “Иван Сусанин” (М.И.Глинка), “Аҡбуҙат” һ.б. операларҙа сығыш яһаған. Төп партиялары: Ҡыҙ (“Сыңрау торна”), Сванильданың әхирәте (“Коппелия”), Кесе аҡҡоштар (“Аҡҡош күле” — “Лебединое озеро”, П.И.Чайковский), Вариация (“Ҡыҙыл мәк” — “Красный мак”, Р.М.Глиэр) һ.б. Мәскәүҙә Башҡорт әҙәбиәте һәм сәнғәте декадаһында ҡатнашҡан (1955). “Сыңрау торна” (“Журавлиная песнь”; Свердловск к/ст, 1959) фильм‑балетында төшкән.
Р.Н.Хәбирова Тәрж. Г.Һ.Ризуанова