ЮЛАЙ АҘНАЛИН
ЮЛАЙ АҘНАЛИН (1729; башҡа мәғлүмәттәр б‑са 1730, Себер даруғаһы Шайтан‑Көҙәй улусы Тәкәй а. — 1797 й. һуң, Эстляндия губ. Балтик Порты ҡ.), Крәҫтиәндәр һуғышында (1773—75) ҡатнашыусы, Е.И.Пугачёв полковнигы. Себер даруғаһының Шайтан‑Көҙәй улусы Юлай а. башҡорто. Шул уҡ улустың старшинаһы. Польша походында (1771—73) күрһәткән батырлығы өсөн бәләкәй ғәскәр байрағы м‑н бүләкләнә. 1773 й. көҙөндә ихтилалға ҡушыла. 1774 й. июнь—окт. Пугачёвтың ҡушыуы б‑са Себер даруғаһы судьяһы вазифаһын башҡара. Июль—окт. Ю.А. отряды Ҡытау‑Ивановка заводын ҡамауҙа ҡатнаша. Нояб. Силәбе ҡ. подполковник И.Л.Тимашевҡа ғәйебен танып килә. Ҡазан йәшерен комиссияһында, һуңынан Сенаттың Йәшерен экспедицияһындағы Мәскәү бүлегендә һәм Өфө провинция канцелярияһында тикшереү аҫтында була. Тән язаһына дусар ителә, Балтик Портына ғүмерлеккә һөргөнгә ебәрелә.
И.М.Гвоздикова
Тәрж.М.Х.Хужин