ШАРТЛЫ ПАТОГЕН МИКРООРГАНИЗМДАР
ШАРТЛЫ ПАТОГЕН МИКРООРГАНИЗМДАР, ауырыу барлыҡҡа килтереү үҙсәнлектәре булмаған һәм һау кешелә инфекцион ауырыуҙар тыуҙыра алмаған төрлө микроб төркөмдәре (бактериялар, бәшмәктәр, иң ябайҙар, вирустар). Организмдың эске мөхитенә пассив күскәндән һуң патоген тәьҫир итә (анатомик барьерҙарҙың бөтөнлөгө боҙолғанда), дөйөм һәм урындағы иммунитет түбәнәйгәндә (һалҡын тейеү, стресс һ.б.) оппортунистик инфекцияларҙы барлыҡҡа килтерә ала. Шартлы патоген энтеробактериялар (эшерихия, гафния, морганелла һ.б.) полиэтиологик ауырыуҙар (гастроэнтерит, пневмония һ.б.) үҫешенә сәбәпсе булырға мөмкин. Диагностика өсөн бактериологик тикшереү мәғлүмәттәре ҡулланыла. Дауалау медикаментоз (бактерияларға ҡаршы, пробиотик препараттар, бактериофагтар һ.б.). Иҫкәртеү: иммунитетты күтәреү, витаминдар, пре‑һәм пробиотик препараттар ҡулланыу һ.б. Медицина университетында 20 б. 80‑се йй. алып Proteus (З.Ғ.Ғәбиҙуллин), Morganella (Д.Т.Гашимова), Citrobacter (М.М.Тойғонов), Serratia (Р.З.Сәләхов), Enterobacter gergoviae ГИСК № 259 (М.М.Алсынбаев, Р.К. Ханнанова, А.А.Әхтәриева) төрҙәге бактериялар штамдарының, Enterobacter, Citrobacter, Serratia (Ю.З.Ғәбиҙуллин) төрҙәре бактериялар монокультураларының һәм бергә культивацияланған варианттарының биол. үҙсәнлектәре, Enterobacter клиник штамдарының адгезив әүҙемлеге (Т.А.Савченко, Әхтәриева), Enterobacteriacеae ғаиләһе шартлы патоген вәкилдәренең вирулентлығы, дарыуҙарға сыҙамлығы (А.К.Болғаҡов), ағыулау көсөнөң молекуляр‑генетик факторҙары (А.Р.Мәүжитов) өйрәнелә.
Әҙәб.: Условно‑патогенные энтеробактерии. Уфа, 2009.
Т.А.Савченко
Тәрж. Г.Ҡ.Ҡунафина