ЮША, һырт
ЮША, Башҡортостан (Көньяҡ) Уралындағы һырт. Белорет р‑ны буйлап Инйәр һәм Кесе Инйәр йй. араһында субмеридиональ йүнәлештә һуҙылған. Оҙонлоғо яҡынса 9 км, киңлеге 1—3 км, абс. бейеклеге 1109,8 м (Ҡайынтүбә тауы). Һыртта бейеклеге 857—1109 м булған 5 түбә айырылып тора. Рельефы уртаса бейеклектәге тауҙарҙан ғибәрәт; битләүҙәре текә, түбәләре һөҙәк. Төньяҡ‑көнсығыш өлөшөндә Аҡһарыҡ, Васильевская Поляна, көньяҡ‑көнсығышта Лиственная Поляна төбәктәре бар; текә битләүле 2 армыт: төньяҡта — Ҡараташ (1103 м), көньяҡта — Дүнәнһуйған (1093 м) тауҙары асыҡ күренеп тора. Һырттың түбәһе һәм битләүҙәре аҫҡы һәм урта рифейға ҡараған машаҡ (кварцлы ҡомташтар, конгломераттар, аргиллиттар, базальттар, риолиттар) һәм юша (алевролиттар, ҡомташтар, балсыҡлы һәүерташтар) свиталарының тоҡомдарынан ғибәрәт. Һырттың көньяҡ‑көнсығыш итәгендә Көҙйылға һәм Мәйгәште йй. (Инйәр ҡушылдыҡтары) башлана. Ландшафтарҙың бейеклек бүлкәтлеге күҙәтелә: ҡара ылыҫлы шыршы‑аҡ шыршы урмандары тундра, көрәнһыу урман, болон һәм тау тупраҡтарындағы таулы тундралар һәм бейек үләнле тау болондары ҡатыш һирәк урмандар м‑н алмашына. Көньяҡ Урал ҡурсаулығында урынлашҡан. Исеме “йәшмә” һүҙенән алынған, тип фараз ителә.
Тәрж. И.М.Япаров