ШТАБЕЛЬ Альфред Артурович
ШТАБЕЛЬ Альфред Артурович (3.9. 1926, Һамар ҡ. – 6.11.2002, Өфө), график. БР‑ҙың халыҡ (2002), БАССР‑ҙың атҡ. (1976) рәссамы. Журналистар союзы (1958), Рәссамдар союзы (1974) ағзаһы. Башҡорт театр‑художество уч‑щеһын тамамлаған (1955; педагогы Я.С.Хаст). 1957–87 йй. “Һәнәк” ж. художество мөхәррире. Сатирик графика үҫешенә ҙур өлөш индергән. Художестволы тасуирлау йәһәтенән сағыу, замана рухына тап килгән карикатуралар, плакаттар, шарждар, китапҡа иллюстрациялар авторы (“Еңеү автографы”, 1985, ҡағыҙ, гуашь; “Озон уйымдары”, 1993, ҡағыҙ, тушь, ҡауырһын). Шулай уҡ эстамп (“Бакенсы”, 1983, автолитография), рәсем сәнғәте (“Николай Островский тимер юл төҙөлөшөндә”, 1955; ҡайһы бер пейзаждары һәм портреттары) өлкәһендә эшләгән. 1960–90 йй. ”Вечерняя Уфа”, “Правда” (“Хәҡиҡәт”), “Известия” (“Хәбәрҙәр”), “Советская Россия” (“Совет Рәсәйе”) гәз., “Крокодил”, “Огонёк” (“Сатҡы”; бөтәһе лә – Мәскәү), “Перец” (“Борос”; Киев), “Чаян” (“Саян”; Ҡазан) журналдары һ.б. м‑н хеҙмәттәшлек иткән. 1948 й. алып күргәҙмәләрҙә ҡатнаша. Шәхси күргәҙмәләре: Өфө (1973, 2001), Мәскәү (1983). Эштәре БДХМ, Эске эштәр министрлығы музейы, Н.А.Островский ис. дәүләт музейы – “Преодоление” гуманитар үҙәге (Мәскәү) коллекцияларында һаҡлана. Респ. йәштәр фестивале лауреаты (Өфө, 1957).
Әҙәб.: Альфред Штабель. Зигзаги века. Сатирическая графика. Политический плакат: кат. выст. /авт.‑сост. С.В.Евсеева. Уфа, 2001.
Тәрж. Г.Һ.Ризуанова