ШӘРӘФЕТДИНОВ Рим Әмир улы
ШӘРӘФЕТДИНОВ Рим Әмир улы (8.5.1969, Одесса ҡ.), рәссам‑мультипликатор, режиссёр. БР‑ҙың атҡ. мәҙәниәт хеҙм‑ре (2015), РФ‑тың почётлы кинематографсыһы (2002). Кинематографсылар союзы ағзаһы (1997). Өфө радиоэлектрон приборҙар эшләү техникумын (1988), Бөтә Союз кинематография хеҙм‑рҙәре квалификацияһын камиллаштырыу ин‑ты эргәһендәге анимация курстарын (Алма‑Ата, 1991) тамамлаған. 1991 й. алып “Башҡортостан” к/ст эшләй. Ш. традицион һүрәтле анимация (ҡара: Анимация киноһы) техникаһында башҡарылған фильмдарының сюжеттары башҡорт әкиәттәре һәм легендаларына нигеҙләнгән. 15‑тән ашыу фильмдың рәссам‑аниматоры һәм реж.: “Һуҡмаҡтар айырылған баҡса” (“Сад расходящихся тропок”; 1994; В.Н.Байрамғолов, Р.Ғ.Ҡамбулатов, И.Р.Рәжәпов м‑н берлектә), “Тәүге осош” (“Первый полёт”; 1996); үҙ сценарийҙары б‑са – “Аҫылташтар тауы” (“Гора самоцветов”) мультфильмдар циклынан “Ялҡау Шәйҙулла” (“Шейдулла‑лентяй”; 2004; С.В.Гордеев м‑н берлектә), “Алдаҡ тоғо” [“Мешок обмана”; 1999, Асыҡ Рәсәй анимация киноһы фестивале дипломанты, Таруса ҡ.; “Кешегә мөрәжәғәт” (“Послание к человеку”) Халыҡ‑ара документаль, ҡыҫҡа метражлы уйын һәм анимация фильмдары кинофестивале дипломанты, С.‑Петербург; икеһе лә —2000], “Ҡыйыу йөрәк” (“Храброе сердце”; 2003), “Ахмаҡ бүре” (“Глупый волк”; 2012), “Алдар һәм һоро бүре” (“Алдар и серый волк”; 2013, Асыҡ Рәсәй анимация киноһы фестивале дипломанты, Суздаль ҡ.; 2013), “Хәйерлегә булһын” (“Ни пуха, ни пера”; 2014) һ.б. “Пилот”, “Кристмас Филмз” студиялары м‑н хеҙмәттәшлек итә (икеһе лә —Мәскәү). 2005 й. рәссам‑мультипликатор сифатында “Ну, көтөп тор!” (“Ну, погоди!”) мультсериалының 19‑сы һәм 20‑се сығарылыштарын төшөрөүҙә ҡатнаша.
Тәрж. Р.Р.Абдрахманов