МАКСИМОВ Владимир Павлович
МАКСИМОВ Владимир Павлович (4.10.1934, Дәүләкән ҡсб, хәҙер Дәүләкән ҡ., — 12.11.1982, Мәскәү ҡ.), тау инженеры‑геолог. Техник фәндәр докторы (1974), профессор (1980). ӨНИ‑не тамамлағандан һуң (1956) “Аксаковнефть” нефть промыслаһы идаралығында эшләй, 1963 й. алып ӨНИ‑лә уҡыта, 1964 й. — “Гидротюменьнефтегаз” ғилми‑тикшеренеү һәм проект институтының бүлек начальнигы, 1969 й. — КПСС‑тың Төмән өлкә комитетында бүлек мөдире, 1974 й. — академик А.П.Крылов исемендәге Бөтә Рәсәй нефть һәм газ ҒТИ‑ның (Мәскәү ҡ.) фән буйынса директор урынбаҫары. Фәнни‑производство эшмәкәрлеге нефть һәм газ ятҡылыҡтарын үҙләштереү менән бәйле. М. тарафынан һыу баҫҡан скважиналарҙы үҙәктән ҡыуғыс электр насостары ярҙамында файҙаланыу өйрәнелә. М. ҡатнашлығында бер нисә технологик процесты берләштергән технологиялар һәм ҡатлам баҫымын тотоу техникаһы эшләнгән һәм индерелгән. Ленин премияһы (1970), И.М.Губкин исемендәге премия (1967) лауреаты. “Почёт Билдәһе” ордены менән бүләкләнгән (1971).
Е.В.Лозин
Тәрж. Г.М.Ғәлиева