КРИВЦОВ Анатолий Иванович

КРИВЦОВ Анатолий Иванович (7.12.1933, Үҙәк Ҡара тупраҡлы өлкәһе Кривцов а. — 8.10.2010, Мәскәү ҡ.), геолог. Геология‑минералогия фәндәре докторы (1975), профессор (1982). РСФСР‑ҙың атҡаҙанған фән эшмәкәре (1991). СССР‑ҙың ер аҫты разведкаһы отличнигы (1983, 1986), почётлы ер аҫты разведкалаусыһы (1984). МДУ‑ны тамамлаған (1962). Фәнни‑производство эшмәкәрлеге металлогенияға, мәғдән ятҡылыҡтарының миҡдарлы моделдәрен төҙөүгә бәйле. Уның тарафынан мәғдән‑формация анализы нигеҙендә ятҡылыҡтарҙы прогнозлау һәм эҙләү ысулы табылған, Башҡортостан баҡыр колчеданы ятҡылыҡтары өйрәнелгән. К. етәкселегендә Рәсәйҙең экзоген алтынлы һәм платиналы территорияһының картаһы төҙөлгән; ер аҫтын өйрәнеүҙең Дәүләт программаһы һ.б. әҙерләнгән. Юбилейный баҡыр колчеданы ятҡылығын асыуҙа ҡатнаша. 330 фәнни хеҙмәт авторы. “Отечественная геология” (“Ватан геологияһы”) журналының баш мөхәррире (1988 й. алып). СССР Дәүләт премияһы (1980), РФ Хөкүмәте премияһы (2001) лауреаты. Почёт ордены менән бүләкләнгән (2001).

  Х е ҙ м.: Палеовулканизм эвгесинклинальных зон Урала и колчеданообразование. М., 1979; Меднопорфировые месторождения мира. М., 1986; Национальная минерально-сырьевая безопасность, 2000.

И.Б.Серавкин

Тәрж. Х.А.Шәрипова