ИБРАҺИМОВ Ғәйнислам Дәүләтбай улы

ИБРАҺИМОВ Ғәйнислам Дәүләтбай улы (7.4.1968, БАССР-ҙың Баймаҡ районы 2-се Этҡол а. — 31.7.2020, Өфө ҡ., тыуған яғында ерләнгән), тәржемәсе, тел белгесе. Филология фәндәре кандидаты (2001). Яҙыусылар союзы ағзаһы (2005). БДУ-ны (1994), Анкара университетын (Төркиә, 1996) тамамлаған. 2000 й. алып БДУ‑ла эшләй (2008 й. башлап Көнсығышты өйрәнеү кафедраһы мөдире). “Урал батыр” (1996), “Аҡбуҙат”, “Ҡуҙыйкүрпәс менән Маянһылыу” (“Башҡорт халыҡ дастандары”, 2000), Салауат Юлаев (2004), Аҡмулла (2007) һ.б. шиғырҙарын; башҡ. фольклоры һәм башҡорт әҙәбиәте әҫәрҙәрен (“Төрки әҙәбиәте антологияһы. Башҡорт әҙәбиәте”, 29—30 т., 2004—2005, бөтәһе лә — Анкара ҡ.) төрөк теленә тәржемә иткән. Фәнни тикшеренеүҙәре төрки телдәрҙең сағыштырма грамматикаһына, төрки халыҡтарҙың фольклорына арналған. Ш.Бабич исемендәге премия лауреаты (2003).

Хеҙм.: Башҡорт телендә исем ҡылымдар. Өфө, 2002; Baskurt Turkҫesi Grameri. Ankara, 1996.

Тәрж. Р.Ә.Сиражетдинов