ФРОЛОВ Александр Павлович

ФРОЛОВ Александр Павлович [27.9.1921, Тамбов губернаһы Заворонежское а. — 10.10.1994, Өфө ҡ., БР‑ҙың Әлшәй районы Раевка эшселәр ҡасабаһында (хәҙер шул уҡ райондың Раевка а.) ерләнгән], лётчик, майор (1945). Советтар Союзы Геройы (1965). Б.В. һуғышында ҡатнашыусы. Чугуевск хәрби авиация училищеһын тамамлаған (1941). 1940 й. алып Ҡыҙыл армияла. 1942 й. сентябренән Көньяҡ-Көнбайыш һәм 3‑сө Украина фронттарында хеҙмәт итә. Герой исеменә 17‑се һауа армияһының 288‑се истребитель авиация дивизияһы 659‑сы истребитель авиация полкының эскадрилья командиры урынбаҫары капитан Ф. 475 хәрби осошта күрһәткән батырлығы өсөн лайыҡ була. 1945 й. алып запаста. 1946—60 йй. Яңы Константиновка мәктәбе директоры, 1961—63 йй. Ҡыҙыл совхозының партком секретары, 1965—85 йй. Казанка урта мәктәбе директоры (бөтәһе лә — Әлшәй районы). Ленин (1965), Ҡыҙыл Байраҡ (1943, 1944, 1944), Александр Невский (1944), 1‑се дәрәжә Ватан һуғышы (1943, 1985) ордендары менән бүләкләнгән. Раевка а. Ф. исеме менән урам аталған, уға һәйкәл, ул йәшәгән йортҡа мемориаль таҡтаташ, Казанка а. мәктәп бинаһына иҫтәлекле таҡта ҡуйылған.

И.Ғ.Кәримова